ഉഡുപ്പി: വാഴപ്പഴം കൃത്രിമമായി പഴുപ്പിക്കാനും നിറം നൽകാനും രാസവസ്തുക്കൾ ഉപയോഗിക്കുന്നതായി കണ്ടെത്തിയതിനെ തുടർന്ന് ഉഡുപ്പിയിൽ നാല് സംഭരണകേന്ദ്രങ്ങൾക്കെതിരെ ഭക്ഷ്യസുരക്ഷാ വിഭാഗം കേസെടുത്തു. അലേവൂരിലെ വാഴപ്പഴം സംഭരണകേന്ദ്രങ്ങളിൽ നടത്തിയ മിന്നൽ പരിശോധനയിലാണ് നിയമലംഘനം കണ്ടെത്തിയത്.
കഴിഞ്ഞ ദിവസം നടത്തിയ പരിശോധനയിൽ വാഴപ്പഴങ്ങൾ വേഗത്തിൽ പഴുപ്പിക്കുന്നതിനായി ഉപയോഗിച്ചിരുന്ന രാസവസ്തുക്കളും കൃത്രിമമായി പഴുപ്പിച്ച പഴങ്ങൾക്ക് നിറം നൽകാൻ ഉപയോഗിക്കുന്ന ലായനിയും ഉദ്യോഗസ്ഥർ പിടിച്ചെടുത്തു. രാസവസ്തുക്കൾ ഉപയോഗിച്ച് പഴുപ്പിച്ച വാഴപ്പഴങ്ങളും പരിശോധനയുടെ ഭാഗമായി പിടിച്ചെടുത്തു.
കുന്ദാപുര അസിസ്റ്റന്റ് കമ്മിഷണർ രശ്മിയുടെ നേതൃത്വത്തിലായിരുന്നു പരിശോധന. സംഭരണകേന്ദ്രങ്ങളുടെ ഉടമകൾക്കെതിരെ കേസെടുത്തതിന് പിന്നാലെ വാഴപ്പഴങ്ങളും അവ കടത്താൻ ഉപയോഗിച്ചിരുന്ന വാഹനങ്ങളിലും ഉദ്യോഗസ്ഥർ പരിശോധന നടത്തി. സംഭവത്തിൽ തുടർനടപടികൾ സ്വീകരിച്ചുവരികയാണ്.
